దేశవ్యాప్తంగా బ్యాంకులు బంద్.. ఎప్పుడంటే..!

ప్రభుత్వ రంగ బ్యాంకుల్లో మరోసారి సమ్మె గంటలు మోగనున్నాయి. తమ ప్రధాన డిమాండ్లను పరిష్కరించడంలో కేంద్ర ప్రభుత్వం, ఇండియన్ బ్యాంక్స్ అసోసియేషన్ (ఐబీఏ) విఫలమయ్యాయని ఆరోపిస్తూ బ్యాంకు ఉద్యోగ సంఘాల ఐక్య వేదిక అయిన యునైటెడ్ ఫోరమ్ ఆఫ్ బ్యాంక్ యూనియన్స్ (యూఎఫ్‌బీయూ) దేశవ్యాప్త సమ్మెకు పిలుపునిచ్చింది. వారానికి ఐదు రోజుల పనిదినాలు, పనితీరు ఆధారిత ప్రోత్సాహకం (పీఎల్‌ఐ) విధానంలో మార్పులు వంటి కీలక అంశాలపై ఉద్యోగ సంఘాలు పట్టుబడుతున్నాయి. ఈ మేరకు ఆదివారం జరిగిన సమావేశంలో దశలవారీ ఆందోళనల షెడ్యూల్‌ను ప్రకటించాయి.

దశలవారీగా సమ్మె ఇలా..

యూఎఫ్‌బీయూ ప్రకటించిన వివరాల ప్రకారం, సెప్టెంబర్ 11న ఒక రోజు దేశవ్యాప్త సమ్మె, సెప్టెంబర్ 28 నుంచి 30 వరకు మూడు రోజుల సమ్మె నిర్వహించనున్నారు. అప్పటికీ ప్రభుత్వం నుంచి సానుకూల స్పందన రాకపోతే, అక్టోబర్ 26 నుంచి నిరవధిక సమ్మెకు దిగుతామని యూనియన్లు స్పష్టం చేశాయి. ఈ సమ్మెల కారణంగా ప్రభుత్వ రంగ బ్యాంకుల సేవలకు తీవ్ర అంతరాయం కలిగే అవకాశం ఉంది.

ప్రధాన డిమాండ్లు ఇవే..

1. వారానికి 5 రోజుల పని: 2024 మార్చి 8న జరిగిన 12వ ద్వైపాక్షిక ఒప్పందంలో భాగంగా, వారానికి ఐదు రోజుల పని విధానాన్ని అమలు చేయడానికి ఐబీఏ అంగీకరించింది. దీనికి బదులుగా సోమవారం నుంచి శుక్రవారం వరకు రోజుకు 40 నిమిషాలు అదనంగా పనిచేయడానికి ఉద్యోగులు అంగీకరించారు. ఐబీఏ ఈ ప్రతిపాదనను ప్రభుత్వ ఆమోదం కోసం పంపినప్పటికీ, రెండేళ్లు దాటినా ఇప్పటికీ ఆమోదముద్ర పడలేదు. ఈ జాప్యంపై ఉద్యోగ సంఘాలు తీవ్ర అసంతృప్తితో ఉన్నాయి.

2. పీఎల్‌ఐ విధానంపై అభ్యంతరం: కేంద్ర ఆర్థిక శాఖ ఇటీవల సవరించిన పీఎల్‌ఐ విధానం తీవ్ర వివక్షాపూరితంగా ఉందని యూనియన్లు ఆరోపిస్తున్నాయి. కొత్త విధానం ప్రకారం, స్కేల్-4, ఆపై స్థాయి అధికారులకు వారి వ్యక్తిగత పనితీరు ఆధారంగా గరిష్ఠంగా 365 రోజుల బేసిక్ పే వరకు ప్రోత్సాహకం లభిస్తుంది. అదే సమయంలో, స్కేల్-3 వరకు ఉన్న అధికారులు, ఇతర సిబ్బందికి కేవలం 15 రోజుల బేసిక్ పే, డీఏ మాత్రమే అందుతుంది. ఇది ఐబీఏతో చేసుకున్న ఒప్పందానికి విరుద్ధమని యూఎఫ్‌బీయూ వాదిస్తోంది. బ్యాంకు మొత్తం పనితీరు ఆధారంగా స్కేల్-7 వరకు ఉన్న ఉద్యోగులు, అధికారులందరికీ ఒకే విధంగా పీఎల్‌ఐ వర్తింపజేయాలని డిమాండ్ చేస్తోంది. ఈ విషయం ప్రస్తుతం చీఫ్ లేబర్ కమిషనర్ వద్ద రాజీ ప్రక్రియలో, ఢిల్లీ హైకోర్టులో విచారణలో ఉంది.

వీటితో పాటు, పెన్షన్ల సవరణ, పెన్షనర్లందరికీ ఒకే డీఏ ఫార్ములా, ఎన్‌పీఎస్ ఉద్యోగులకు పాత పెన్షన్ విధానంలోకి (ఓపీఎస్) మారే అవకాశం కల్పించడం వంటి పెండింగ్ సమస్యలను కూడా పరిష్కరించాలని యూఎఫ్‌బీయూ కోరుతోంది. తమ డిమాండ్లపై ప్రభుత్వం వెంటనే స్పందించి చర్చలు జరపాలని, లేనిపక్షంలో ఆందోళన ఉద్ధృతం చేస్తామని హెచ్చరించింది.